‏” أخلى ذاته “‏

‏”لكنه أخلى نفسه، أخذ صورة عبد، صائرا فى شبه الناس” (فيلبى 2 : 7) من لحظة ميلاده ‏و لغاية صلبه، اتحققت الأية ديه فى حياة يسوع المسيح .. خلونا نقف شوية النهاردة عند ‏خميس العهد (أو خميس الأسرار) .. بصراحة اليوم فى حاجات كتير ممكن نقف عندها و ‏نتأمل فيها .. تعالوا نفكر و نتأمل فى “غسل الأرجل” ‏

‏”قام عن العشاء، وخلع ثيابه، وأخذ منشفة واتزر بها.ثم صب ماء فى مغسل، وابتدأ يغسل ‏أرجل التلاميذ ويمسحها بالمنشفة ” (يوحنا 13 : 4 – 5)‏

لو رجعنا للعهد القديم هنعرف ان “غسل الارجل” كانت مهمة الخادم اللى فى البيت .. ابدا ما ‏كان صاحب البيت بيغسل رجل ضيوفه .. كان دايما الخادم.‏

مين ممكن يعمل ده الا اذا كان بيحب .. و محبة يسوع مكنتش محبة عادية، لكن قوة محبته ‏وصلته انه يتخلى عن مكانته “السيد و المعلم” و ينزل يغسل رجل تلاميذه .. و ده يخلينا نسأل ‏نفسنا النهاردة كيف ينحنى المعلم العظيم ليغسل أرجل تلاميذه ؟! و كيف ينحنى الرب نفسه ‏ليغسل أرجل صنعة يديه ؟!‏

علشان نفهم ده خلونا نشوف اللى يسوع نفسه قاله : “أتفهمون ما قد صنعت بكم ؟ أنتم ‏تدعوننى معلما وسيدًا، وحسنًا تقولون لأنى أنا كذلك، فإن كنت – وأنا السيد والمعلم – قد ‏غسلت أرجلكم، فأنتم يجب عليكم أن يغسل بعضكم أرجل بعض، لأنى أعطيتكم مثالاً ، حتى كما ‏صنعت بكم تصنعون أنتم أيضًا” (يوحنا 13 : 12 – 15) ‏

يسوع طلب بكل صراحة من تلاميذه انهم يتعلموا منه و يعملوه زيه .. و احنا النهاردة بتطلب ‏مننا نفس الحاجة ‏

دعوة لكل واحد فينا السنة ديه انه اليوم ده ميكنش بيمر زيه زى اى يوم بيعدى .. كل واحد فينا ‏يتأمل فى الحدث ده .. و يفكر شوية فى حياته .. هل احنا بجد عندنا المحبة ديه بتاعت يسوع ‏المسيح ؟ّ! .. هل عندنا الاستعداد ده انه نتنازل شوية (و لو صغيرين) عن كبريائنا قدام محبتنا ‏؟! ولا احنا بنعمل العكس .. بتنازل عن محبتنا قدام كبريائنا ؟!‏

يسوع مش بيطلب مننا المستحيل .. كل مرة بنقدم خدمة لحد من غير ما نكون شايفين نفسنا ‏احسن منه .. كده بنعمل زى يسوع … كل مرة قدام محبتى للأخر بنقبل انه ننزل شوية .. كده ‏بنعمل زى يسوع … يسوع لما طلب مننا نغسل رجل بعض زى ما هو عمل .. كان بيطلب ‏مننا وقتها يكون عندنا التواضع و البساطة فى حياتنا.‏

‏24/4/2019‏